Әйел, ана, арулар тақырыбына арналған Ғабит Мүсірепов
шығармаларының ішіндегі ең көлемдісі де, көрнектісі де – «Ұлпан» романы.
Өзінің бар ерекшелігімен, көркемдік бітімімен, романда көрінетін Ұлпан тек
қана жазушының өз шығармашылығы емес, бүкіл қазақ әдебиетіндегі оқшау
тұрған әдеби бейне. Туындыда қарапайым қазақ қызының ел анасына
айналуына дейінгі оқиғалар баяндалады. Қазақ ауылының жүз жылдық
тұрмысы, әдет-ғұрпы, барымта, қалыңмал беріп, қыз айттыру, бай мен кедей
арасындағы, ел арасындағы жер дауы, жесір дауы мәселесі де қалыс
қалмаған. Әрбір адам кітапты оқып шыққаннан кейін қазақ болып
туылғандығын мақтан тұтып, өмірлік мақсатын айқындай алады деп
ойлаймын. Ер азаматты қадірлеуді, ата-анаға, ел-жұртқа қамқор болуды
үйрене аласыз.
Жеті мың бетке жуық қолжазба, жазу кітапшаларын қалдырған
Леонардо да Винчиге еліктеген қазақтың сөз зергері Ғабит Мүсірепов қойын
дәптеріне «Менің Джокондам – Ұлпан» деп жазған екен.
Ұлпан – аналардың анасы, ел билеген көсем, сөз бастаған шешен, аузы
дуалы қоғам қайраткері. Осындай аналарымызды бүгінгі ұрпаққа насихаттау,
қыздарымызға үлгі ету әрбіріміздің парызымыз деп білейік. Оқыңыздар! Көз
жеткізіңіздер! Толқыңыздар!
2 комментария
«Ұлпан «романы қайсар рухты қазақ халқының Ұлы аналарының даналығын дәріптейді.Жас кезіндегі Ұлпан еркін,ерке болғанмен әдептен аттамаған.Сонымен бірге өзін өзгеге билетпеген.Жаспын демей Есенейдей ел азаматына ақылына көркі сай жар бола білген.Романды оқи отырып Ер-азаматты қадірлеудің үлгісін көреміз.Ұлпан тағдырына бағына отырып,өзінің еркіндігін, қайсарлығын жоғалтпаған.
Бүгінгі бір отбасының ,бір еркектің бабын таба алмай,не еркегін сыйламай не өзін сыйлата алмай жүрген кейбір жас замандас аналар осындай классикамен сусындамаған деп түсінемін
Романды оқушы кезде оқысам да бүгінде қолыма жиі алып әр жерін қызыға қайталап оқысам—жоғым түгелденгендей,сусыным қанғандай боламын.
Отбасында қыздарыма да оқы деп отырамын.Бір ұл, төрт қыздың анасымын.Ұлпан-Ұлтымыздың Ұлы аналарының бейнесі.Соны есінде сақтасын,Ұлтына қызмет етсін,Ер-азаматын сыйлаудың үлгісін көрсін деймін.
Осы шығармада Кенесарыны төмендетуге тырысу байқалады. Бірақ Кенесары одан төмендеп қалған жоқ. Кенесары бәрінен жоғары тұр.